சித்திரை முதல் நாள் மீண்டும் தமிழ்ப் புத்தாண்டா?

சித்திரை முதல் நாள் மீண்டும் தமிழ்ப் புத்தாண்டா?

இது பார்ப்பனப் பண்பாட்டுப் படையெடுப்பே!

தமிழர் தலைவர் கண்டனம்!

நாகப்பட்டினம் ஆக. 23- தை முதல் நாள் தமிழ்ப் புத்தாண்டு தொடக்க நாள் என்று தி.மு.க. ஆட்சியில் கொண்டு வரப்பட்ட சட்டத்தை மாற்றி, சித்திரை முதல் நாள் தான் தமிழ்ப் புத்தாண்டு என்று புதுச் சட்டம் கொண்டு வந்துள்ள அ.தி.மு.க. ஆட்சிக்குத் திராவிடர் கழகத் தலைவர் கி.வீரமணி கண்டனம் தெரிவித்துள்ளார்.

இன்று, நாகப்பட்டினத்தில் செய்தியாளர்களிடம் அவர் கூறியதாவது:

ஏற்கெனவே தி.மு.க. ஆட்சியில் தை முதல் நாள் தமிழ்ப் புத்தாண்டு என்று சட்டம் இயற்றப்பட்டு இரண்டாண்டு காலமாகிவிட்டது. நடைமுறையிலும் உள்ளது. மறைமலை அடிகள், கா.சு.பிள்ளை, தந்தை பெரியார், அறிஞர் அண்ணா போன்ற தலைவர்களால் ஏற்கப்பட்டு வலியுறுத்தப்பட்டதுதான் தை முதல் நாளே தமிழர்களின் புத்தாண்டுத் தொடக்கம் என்பதாகும்.

சித்திரை ஒன்று தமிழ்ப் புத்தாண்டுப் பிறப்பு என்பது ஆரிய ஆபாசக் கதையை அடிப்படையாகக் கொண்டது. (நாரதர் என்ற ஆண் கடவுளுக்கும், கிருஷ்ணன் என்ற ஆண் கடவுளுக்கும் பிறந்ததாம்!) அதனை மீண்டும் கொண்டுவர சட்டம் இயற்றுவது தமிழர்கள் மீது தொடுக்கப்பட்ட பார்ப்பனப் பண்பாட்டுப் படையெடுப்பாகும். இது வன்மையாகக் கண்டிக்கத் தக்கதாகும்.

- இவ்வாறு செய்தியாளர்களிடம் திராவிடர் கழகத் தலைவர் கி.வீரமணி கூறினார்.