அறிஞர்அண்ணா.இன்ஃபோ

அறிஞர்அண்ணா.இன்ஃபோ http://arignaranna.info/

நாட்டிலே பரவிக் கிடக்கும் நானாவிதக் கருத்துகளையும் ஊன்றி கவனித்துப் பாருங்கள். மக்கள் தமது இல்லாமைக்கும் இழிநிலைக்கும் விதி, கர்மாவினை ஆண்டவன் விட்ட வழி என்று வேதாந்தம் பேசி ஏதோ இருப்பதைக் கொண்டு திருப்தியடைய வேண்டும் என்ற அளவிலே இருப்பதைக் காணமுடியும். என்ற அறிஞர் அண்ணாவின் சிந்தனையுடன் நம்மை வரவேற்கிறது அறிஞர் அண்ணா இணையதளம்.

அண்ணா பரிமளம் அவர்கள் தொடங்கிய அண்ணா பேரவை சார்பில் இவ்விணையதளம் தொடங்கப்பட்டது. தொடர்ந்து மிகச் சிறந்த முறையில் அறிஞர் அண்ணா பற்றிய தகவல்கள், அவரது படைப்புகள் அடங்கிய கருவூலமாகத் திகழ்கிறது இத்தளம். அண்ணாவின் சிறப்புகள், அண்ணா வரைந்த ஓவியங்கள், சுவையான சம்பவங்கள், வாழ்க்கை வரலாற்றுத் தொகுப்பு, நிழற்படத் தொகுப்பு ஆகியவற்றுடன் அண்ணா பற்றிய ஆவணப்படம், குறும்படம் போன்றவையும் இத்தளத்தில் சிறப்பிடம் பெறுகின்றன.

அண்ணாவின் உரை கேட்க வசதியும் செய்யப்பட்டுள்ளது. அள்ளக் கிடைக்காத அரிய கருத்துகளை அவ்வளவு எளிதில் தொகுத்துவிட முடியுமா? அதனால் வாரம்தோறும் புதிய புதிய கட்டுரைகளை, தகவல்களை ஏற்றிவருகிறார் இதன் அமைப்பாளர் இரா.செம்பியன். அத்துடன், அண்ணா ஆர்வலர்களுக்குப் புதிய தகவல்கள் பதிவேற்றப்பட்டிருப்பது குறித்து மின்னஞ்சலும் அனுப்பப்படுகிறது. இத்தகைய ஆக்கப்பூர்வமான பணியைச் செய்துவரும் தோழர்கள் நம் பாராட்டுக்குரியவர்கள்.

அவசியம் படிக்க வேண்டிய, பிறருக்கும் பரப்ப வேண்டிய தளம் இது.